The National Drug Law Enforcement Agency (NDLEA) don score what many people dey call the "biggest goal" for the history of drug war for Nigeria. The boys from the elite Special Operations Unit (SOU) don scatter one heavy transnational cartel wey Nigerian drug barons and Mexican cartel experts dey run together.
The NDLEA Chairman, Brig. Gen. Mohamed Buba Marwa (Rtd), yarn the media today for Abuja say between May 16 and 18, 2026, him men block one massive secret laboratory wey hidden deep inside Abidagba forest for Ijebu East, Ogun State.
The total value of the Methamphetamine and the chemicals wey dem catch for the forest? A whopping ₦480 billion (about $362 million)!
The lab belong to one group wey dem dey call the Anochili Innocent Drug Trafficking Organisation. NDLEA say the factory big well-well and e get mouth to produce about 50 kilograms of pure Meth (Mkpuru Mmiri) every week!
The arrangement na say: the Mexican boys provide the technical "brain and chemical juju" to cook the drug, while the Nigerian partners handle how the thing go take enter market for Europe and other countries.
NDLEA lock down 10 suspects inside this operation. Check the breakdown:
-
The Mexican "Chefs": Martinez Felix Nemecto (46), Jesus López Valles (40), and Torrero Juan Carlos (51). Dem catch these ones live inside the forest.
-
The Nigerian "Logistics" Team: Nwankwo Sunday Christian, Igwe Abuchi Remijus, Ifeanyichukwu Chibuike Joshua, Egwuonwu Uchenna Victor, and others wey dem pick for Lagos and other sides.
Gen. Marwa no use grammar hide him mind. He tell international drug dealers say make dem delete Nigeria from their map because the country don become "hostile environment" for their business.
Marwa talk say: "This na one of the most significant breakthroughs for our fight against organized crime." He even give "thun's up" to the US DEA and other international partners wey give dem the coded intelligence to trace the factory.
Comments
Add a comment