Independent National Electoral Commission (INEC) don announce say over 1.37 million Nigerians don complete their online pre-registration for Continuous Voter Registration (CVR) exercise inside di first week wey dem launch am.
According to Mr. Sam Olumekun, INEC National Commissioner wey still be Chairman for Information and Voter Education Committee tok say total of 1,379,342 Nigerians don pre-register nationwide between Monday, August 18, and Sunday, August 24. Di data wey commission release show say some states get plenty turnout, with Osun State lead for pre-registration with 393,823 people (28.51%), followed by Lagos with 222,205 (16.11%). For the other side, Ebonyi State record the lowest number with just 261 pre-registrations. Dem still break down the numbers like this: Gender: 717,856 (52.04%) na female, while 661,846 (47.96%) na male. Age: Young people wey dey between 18 and 34 years plenty pass, dem be 860,286 (62.37%). Occupation: Students plenty wella as dem represent di biggest group with 374,534 (27.15%). Disability: 27,089 (1.96%) of di people wey register na persons with disabilities. Olumekun still remind Nigerians say di physical registration phase don start Monday for INEC offices nationwide. E beg all eligible citizens wey never register make dem hurry do am, make dem no wait reach August 30, 2026 deadline to avoid last-minute rush. E still stress say double or multiple registration dey against di law.
