Manchester United don officially part ways with their Head Coach, Ruben Amorim, after just 14 months for the job. Di club confirm di development on Monday, January 5, 2026, through statement from their Communications Department.
Amorim wey Manchester United appoint for November 2024, lead di Red Devils reach UEFA Europa League final for Bilbao in May 2025, but di club say dem don “reluctantly” decide say e don reach time to make change.
With Manchester United currently sitting sixth for Premier League table, di club leadership believe say new direction go give di team better chance to finish strong for di league.
“We thank Ruben for his contribution to the club and wish him well for the future,” Manchester United talk for their statement.
Former United midfielder Darren Fletcher don now step in as interim manager and go take charge of di team for their next Premier League match against Burnley on Wednesday.
Boardroom Tension, Poor Progress
Sources close to di club tell BBC Sport say United management no see enough progress or clear evolution under Amorim, despite heavy investment in players.
Just days before him sack, Amorim hint say e no happy with di level of interference from Manchester United board. Reports also talk say e get very tense meeting with Director of Football, Jason Wilcox, shortly before di decision.
On Sunday, Amorim talk say e want work as “manager, not just coach” and admit say e fit leave once him contract expire.
After di sack, Amorim bin even spotted dey take walk with smile for him face.
United Go Appoint Caretaker, Permanent Coach Go Wait
Manchester United plan to appoint caretaker manager wey go run di team till end of di season, while dem wait till summer before naming permanent head coach.
Names wey don already dey linked to di job include Crystal Palace coach Oliver Glasner, former Chelsea boss Enzo Maresca, and ex-England manager Gareth Southgate.
Amorim Time for Old Trafford
Amorim journey for Manchester United get mixed moments. After resuming officially from Sporting for November 2024, e later describe him team as “maybe di worst” in club 147-year history.
Despite dramatic Europa League semi-final comeback against Lyon, United later lose final to Tottenham. Di club also suffer their worst-ever Premier League finish for 2024/2025 season, ending 15th with 42 points.
Even after spending over £200 million on new players like Benjamin Sesko, Bryan Mbeumo and Matheus Cunha, results no improve much. Shocking Carabao Cup exit to League Two Grimsby and poor home form for Old Trafford seal Amorim fate.
As Manchester United prepare for Burnley clash under Darren Fletcher, fans for Manchester, London, Nigeria and across di world dey watch closely to see wetin next chapter go hold for di Red Devils.
