President Bola Tinubu don halla well-well as he condemn the way gunmen take kill innocent people for Plateau and Kaduna states. He talk say that kind move na "coward work" and e go against everything wey Nigeria stand for.
The President talk this one through a statement wey him Special Adviser on Information and Strategy, Bayo Onanuga, release for X (the platform wey be Twitter before). Tinubu promise Nigerians say the people wey do this wicked tin no go ever go free.
The matter concern the bad attack wey happen for Angwan Rukuba area for Jos, and another one for Kahir village for Kaduna, where gunmen carry wedding guests go forest after dem kill some people.
"Anybody wey go hide for night go dey kill people wey no get defense, na big coward be that," Tinubu talk. He say the reason why dem attack Jos na because dem wan make people start to dey pay back (reprisal) so that blood go flow more-more, but he say e no go work.
President Tinubu give security people "marching order" say make dem double their engine and pursue the killers reach where dem dey hide. He also order dem make dem rescue all the wedding guests wey remain for the kidnappers' hand sharp-sharp.
The President still talk other levels; eim say Government dey buy "heavy-duty" equipment and machines wey go help security people track criminals for real-time. Also warn people (and some media house) wey dey spread fake news or dey try paint the matter like say na religious war. He say make security people catch anybody wey dey try set the country on fire with lies.
Eim still tell communities say make dem follow the advice wey security people dey give, especially if dem tell dem to move from one place to another for their own safety.
The President hail the Governor of Plateau State, Caleb Mutfwang, and the Governor of Kaduna, Uba Sani, for the way dem take try control the matter and support the rescue work. He say him government dey back dem fully.
He come send him sympathy give the families wey lose their person, and he pray make the people wey sustain injury quick get well. He end am say the days of these criminals don finish as government don ready to "smash" dem anywhere dem hide.
