Political fire don catch for Abuja as the African Action Congress (AAC) carry President Bola Tinubu and the National Assembly go Federal High Court over how the President take travel commot for country without handing over power to Vice President Kashim Shettima.
The suit, wey AAC National Legal Adviser Inibehe Effiong file on Monday inside Abuja, also join Attorney-General of the Federation Lateef Fagbemi, Senate President Godswill Akpabio, and House Speaker Tajudeen Abbas as defendants inside the matter.
According to AAC, President Tinubu commot Nigeria since August 30 for one "working vacation" for Europe, come later extend his stay.
The party dey tell court make dem declare say Tinubu break Section 145(1) of the 1999 Constitution because he no write official letter transmit power give Senate President and House Speaker before he travel.
AAC talk say the Constitution make am compulsory say President must write that letter before he go on vacation, and to jump that rule na
"undemocratic move and gross violation of the law."
The matter no stop for Tinubu alone. AAC also tell court say the National Assembly break Section 145(2) of the Constitution because dem fail to pass official resolution make Vice President Shettima start to act as President after Tinubu absence pass 21 days.
Inside the suit, AAC dey demand:
-
An order of perpetual injunction make court stop Tinubu or any future President from traveling on vacation without transmitting power first.
-
Clear court declaration on whether Section 145 allow President to travel go chill abroad without writing give National Assembly.
For now, court never fix official date to hear the case.
On top the matter, Presidency don maintain ground say Tinubu no break any law. Dem talk say President fit run government from anywhere for the world, as his constitutional powers no dey tied to where he physically sit down.
Comments
Add a comment