|
Presido-for-now, Goodluck Jonathan don appoint retired Aliyu Gusau to take b National Security Advise person. Lt. Gen. Gusau dey replace retired Sarki Mukhtar. Senior Special Assist person ontop talk-talk to presido-for-now, Ima Niboro for inside talk, im say Dr. Jonathan bin great Maj. Gen. Mukhtar ontop d work wey im dey do for inside we country and im wish am beta for inside future.
Dem decide dis one afta d National Security Council wey we presido-for-now dey front of d meeting.
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
D 400 people wey kpai for inside 3 community inside Jos say dem don give dem mass burial for inside Dogon Na Hauwa yestaday. Afta d burial, plenty Berom youth dem bin do para waka wey dem swear say dem must do dem back .
Chairmo notop Recovery owit Evacuation Comitee, Solomon Zang, talk say d thing increase reach 600 sake of say dem still dey see more ded body for inside Dogo Na Hauwa, Ratsat and Zot village dem.
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Meanwhile, Senate don para ontop d Jos gbege, wey dem talk say dis one nor different from terrorism, say dem must waka against am. Senate talkperson, Ayogu Eze, wen im bin dey folo news people talk for inside yestaday, im talk say dem must catch all d bad people make dem for face law well well.
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
Still ontop d mata, Ac don talk say dem nor hapi for inside d gbege wey don kpai plenti people. For inside talk wey im do wit we talk person Esther Oyegwe, AC Publicity Seke, Lai Mohammed do warning say d gbege go still continue until we govament torchlight, catch and punish d people wey dey cause d gbege.
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
½ of 1 million people go need move comot dem house wey dey for mountainside inside Uganda ontopsay d ground fit shift. Dem berlive say plenti people don kpai for inside last week wen plenti sand sand cover d place wey people dey stay for inside Mount Elgon.
D govament talk say dem go carry d 200, 000 people wey dey live for d west near Ruwenzori Mountain join d people wey dem go move go anoda place.
:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::
US don talk say Israel talk ontop new building for wey Jew people dey stay inside West Bank, say dis one nor go against d ban wey dem just announce. But one US talkperson talk say nah dis kain thing d two side suppose dey avoid.
Israel don promise one 10 month stop ontop d building mata for inside West Bank but nor b so for inside East Jerusalem.
|
Marketing
